صادوووه.......شكوووه

قالت: قصيدك جد والناس ملوه
ومشاعرك فيها جمود وقساوه

شعر الفخر دقه قديمه وعافوه
خلك مجدد وش تبي بالبداوه

مالك ومال "القدس" واللي إستحلوه
ومن عقبها "بغداد" وأرض "السماوه"

تبغى ترجع شي يا"سعيد" باعوه
والعرق ما يحيا بليا نداوه

خلك مع اللي أكثر الناس حبوه
له في ضمير الشعب قدر وحفاوه

شعر الغزل بأحلا العبارات صاغوه
أسلوب راقي زايدٍ بالطراوه

وإنكان للجمهور بالصوت عدوه
جرة حبال الصوت فيها رخاوه

قلت: إنتهيتي؟ قالت:أيوه أيوه
قلبي صويب يابن الأجواد داوه

شفت الذي محدن من الناس شافوه
لوكان ما ودي أزيح الغطاوه

عطني قصيدٍ لا طرى الناس غنوه
والا تلي وسط المجالس تلاوه

وصّف جمالٍ عام تسعين غطوه
واحرق قلوبٍ عاد فيها شقاوه

كم لي وأنا وياك "حدوه ...ردوه"
مدري جلافة طبع ولا غباوه

والا تخاف يقال :ياناس شوفوه
اللي ترك درب الهدى والقداوه

وأنت الغلام اللي علي الذيب سموه
يا حيسفا والله فيك السماوه

قلت: إسمعي... ماصارت "إخذوه ..غلوه" !!
خلي التفاهم بالعقل والهداوه

الأوله:- مانيب " صادوه شكوه"
كانك تبين الوضع لعب ولهاوه !!

والثانيه:- سر المحبين صانوه
ويكرم عن دروب الخنا والدناوه

والثالثه:- قلبي مع " _____" هاتوه
حبه تساقى في عروقي سقاوه

من جور حبه صحت "أوااه" و"أحوه"
فدوه لها عيني وكلي فداوه

ما عمرها قالت لي "أمبيه" و "أكوه"
ذربة كلام ونطقها من رهاوه

وعيونها تسحر بلا " Lens" غشوه
ماهيب مثلك يا عيون القطاوه

عين العديم اللي علي الصيد هدوه
له خزرة فيها جمال وضراوه

المغتر الوافي من إيران جابوه
ماكر ..وشكل.. وطيب فعله علاوه

يلحق طيار "الربد" ما قيل زلوه
وان كوبرت في القاع عنده سطاوه

قرم مسك بيدينه اللي ذبح بوه
زودٍ علي الصمله تسوقه عداوه

والخصر شبر واحد يوم قاسوه
والريق كنه ذايب في حلاوه

ريح الخزامي والنفل منه شموه
أو ريح مسكٍ خالطه عود "جاوه"

وجدي عليها وجد منهو قتل خوه
رمية خطا حطت بكبده شظاوه

أو وجد شيخٍ بعد ما شاب ضاموه
ربعه وراحت عنه كل الحفاوه

ماله عوين ينصره يوم ذلوه
يا شين ذل الشيخ عقب الجراوه

أو وجد ذاك اللي عن الحكم زاحوه
جاته جيوشٍ مثل سيل النحاوه

داسوا حدود الدار والحزب حلوه
يشرب هماجٍ عقب شرب العذاوه

تذبح عياله وأقرب الناس خانوه
صابه دعاء المظلوم وأهل الفتاوه

هذا بعض وجدي عليها وزيدوه
يا حمس كبدي حمس بنٍ بتاوه

من بعدها وش لي بهالعشق "ياهوووه"
يكفي التسلي بالقصايدسلاوه

وقولي يقول سعيد" (يا ناس خلوه)
وروحوا لمن يكتب قصيده فضاوه

أما أني اكتب ما تريدون فإنسوه
وعن الحقايق ما بعيني غشاوه

وأدخل علي الله لا تقولين "صادووووه"
طاح الحمالي في يدي .....

" يا حلاوه"