خلفة الأجواد

لـ سعيد الحمالي، ، بواسطة سماهر، في غير مُحدد

خلفة الأجواد - سعيد الحمالي

أحمد اللي عزني في كل شان
والمراجل حظ معطى ومحروم

لابتي لابه ولي زند ولسان
ماخذلوني من خلقني الله يوم

حالفن ما أرد شوري للجبان
مثل حلفي عن مخاواة الرخوم

ومن طلبني شهود فشهودي الزمان
والرجال اللي يجيبون العلوم

كنت اظن العشر ما ترجع ثمان
لين حط الوقت في سيفي ثلوم

ماعلى الدنيا ولا هلها ضمان
والرفيق يصوب بظهري سهوم

والله إني كاشفٍ وضعه زمان
غير أصون الزاد وأحفظ السلوم

خلفة الأجواد مني في أمان
أحشمه من حشمة الربع القروم

الخزامى والنفل والقحويان
ردها لي خوط كراثه وثوم

والحساني ما جزاها الا الحسان
ومن جزاها بالردى يغشاه لوم

العذر لله ثم روس قحطان
يوم جاء في العلم لمسٍ للخشوم

عينه الصفراء ونظرات الهوان
فوق وجهه طمغة الذله وسوم

شرخ جدره ما يغطيه الدهان
والرخامه ما تغطيها الهدوم

ما ذكر له فعل وقتال وطعان
المراجل عنده هروج وحلوم

وسط سوق المرجله ماله مكان
ما يشب النار والراس محكوم

ريّس بلا راس يا كوفي عنان
لو تريّس حزب مع مجلس عموم

خاسر اللي حط في مثله رهان
طاح حظه جعل حظه ما يقوم

غلطه إني قلت له كبوة حصان
والحصان إسمه عن العير محشوم

ومايسبك في قفاك الا الجبان
((ومايذم الطيبين الا الرخوم))

© 2024 - موقع الشعر