يا عاذليني

إيحبَّني والقلب هاونه
غالي ولو بيزيد (ف) اعذاره

معذور خلّي عذْر حيْث انّه
عالي مقامه زان مقْداره

شاعر عطاني حب بلا منّه
قلبي و عيني دوم سمّاره

يكتب قصيده شوق بس لنّه
يهوى قصيدي ذوق (ف) اشعاره

يشتاق لي والقلب شاقنّه
واشتاق له لو طال مشواره

في غيبته حقّي مخبنّه
محفوظ حقّه حفظ أسراره

يا عاذليني والهوى فنّه
موتوا قهرْ موتوا على ناره

ناره تولّع من يَأنْأنَّه
أنّه و أنّي (ف) الحشا ثاره

يا ويل من هو يقترب منّه
حبّوب قلبي والغلا داره

في خافقي حنّه على ونّه
ونّة غريم(ن) شاع نواره

مبْعد بعيد(ن) والبعد كنّه
شنّه لشوقي عمْد واختاره

ما قول روّح لا ولكنّه
عذره معايه والعذر ياره