همسـات قلب - الحميدي الحربي

غابت نجوم الليل والنفس حايره
والقلب مما به كبارٍجهايره

يبيع في سوق الروابع ويشتري
لاشك ربحه مايغطي خسايره

يذكر من الماضي طراته ولوعته
في حاضر ماحصل الا عزايره

الهايم الولهان مثلي إلي اشتكى
قسوة زمانه لاتقولون سايره

إلي قام ياس الحب يطغي على الرجا
قدرة وجيع القلب هلت عبايره

والحب لذاته ولو طال وقتها
مثل الطيوف اللي بالاحلام زايره

إلي استيقظ الولهان زلت طراتها
لكن حشاه تزيد لاهب سعايره

أنا الذي عقب المسرات والهنا
علي قاسي الوقت دارت دوايره

في غبة الحرمان غرقت مراكبي
والبحر هايج والعواصيف جايره

مرات الوم الحظ واقول خانني
ومرات أقول الوقت هذي سوايره

الضيق من ميل الي ميل ينفرج
كالصبح تالي الليل تظهر بشايره

واحاول اخفي مابروحي من الولع
واهدي اشواق من الوجد ثايره

لكن جريح القلب لو حاول العزي
لازم شرود الذهن يفضح سرايره

يلومني من همه القوت والكرى
وعما سواهن معمي الله بصايره

ماسمع همساتٍ من القلب تندفع
للقلب وتعيد الربيع لضمايره

إلي قام يسترجع صداها بوحدته
تصور الافلاك لرضاه دايره

ولا عاش لحظات اللقاء...نشوة الفرح
في غيبة الحاسد وغيبة نطاير

في موقف ٍنظرات الاحباب بينهم
باسرارهم من غير منطوق سايره

لحضات حلوه مايكدر حلاتها
إلا الفراق الي فجتهم نذايره

وصار اللقاء ذكرى والاحزان منتهى
لقلوب ذابت وجد ونفوس حايره

© 2024 - موقع الشعر