ياصبا نجد - الحميدي الحربي

ياصبا نجد جددت الجروح القديمه
يوم ذعذع هواك وخالي البال نايم

ياصبا نجد ليت أهل الحسد والنميمه
منك تستوحي اللين وصفاء النفس دايم

لأجل من يشتكي لوعات فرقا نديمه
مايصيرون ضده بين واشي ولايم

ياصبا نجد وين اللي وصوفه عديمه
نار فرقاه حطت في فؤادي علايم

ياصبا نجد قله كان ظيمي يظيمه
لايطاوع بحبي ناقلين النمايم

مثل ماقالوا (العاقل ضميره خصيمه)
والله إني من أجله عن هوى الغير شايم

ياصبا نجد لولا أهل العقول السقيمه
يصنعون السوالف بين زور وظلايم

كان والله لاجيه بصورةٍ مستديمه
المسافات ماتفرق قلوب تلايم

© 2024 - موقع الشعر