يشوق عيني - احمد السكران

يشوق عيني شوف ذودٍ من النوق
معهن فحلهن في رياضٍ مريفة

يمشن ويرعن من زهر كل زملوق
لوشافهن متضايقٍ طاب كيفه

حاميهن الوالي بحفظه عن البوق
ايضا ومن شر النفوس الضعيفة

معهن فتى ماهوب خبلٍ ومطفوق
عاقل ومتدين ونفسه خفيفة

وانا ببيت من الشعر معتلي فوق
وان مر طرقيٍ لزوم استضيفه

والشق فيه اللي لها حلو منطوق
مكتملةٍ باالزين ماهيب شيفة

هي شوقي من البيض وانا لها شوق
ولااظن ابلقى مثل شوقي وصيفة

ياالله يااللي رازقٍ كل مخلوق
يامن يدير الكون بامره وكيفه

ارجيك حقق حلم شلته بطاروق
نوقٍ ومعهن بنت زينه عفيفة

ذاقول من لاينطق القول مسروق
ينظم قوافي من ضميره نظيفة

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر