للي علينــــا حكـــــت - نوض سدير

بسم ربي وخّلاقي أببدا واكتب الاشعار
وبرسلها إلى اللي بيّتت لاهل الوفا النيه

هروجك هبت وشبت على صدري مثل الاعصار
وقلت اعلمك ردي على شعرك وانا بنيه

اذا كانك قصدتينا وقصدتي ديرة الأخيار
خسيتي والله ويخسى قصيدك مع قوافيه

بلدنا الغالية ماهيب حبس وسجن للاحرار
بلاد العز يوم العز نوّخ في السعوديه

واذا كانك على حجاب الستر ضربتي الأوتار
ترى تعتب عليك حروف شعرك مع معانيه

أنا افخر في جمالي وافتخر في حشمتي في الدار
حشى مانيب مثلك أكشف وصوفي علانيه

يابنت احذرك ليا يدينك تحترق بالنار
وترى ذا موطني بالكون مابه موطن ٍزيه

بلاد ٍ شمسها شعت بنور الدين في الاقطار
تحكم الشرع ماهيب تحكم باحكام وضعيه

بلدنا وانتي ابخص أهلها اللي يكرمون الجار
بلد نسل الشيوخ اللي لهم في العز ماريه

و قصيدي ترجم احساسي وجالك ماعليه غبار
واذا ودك قلبت الرد لجل الدار رديه

© 2024 - موقع الشعر