عاد عيدك ياحروفي ..

في ثاني أيام العيد توفي المرحوم الراحل الأمير طلال الرشيد وبعد ثلاث سنوات في مثل هذا اليوم كتبت هذه القصيدة .. إلى جنات الخلد ياأبو نواف
عاد عيدك ياحروفي وارتفع صوت القصيد

وعاد عيدك يادموعي وابتدى ليل العباير
يرحم الله الفقيد ابن الفقيد ابن الفقيد

ويرحم الله من توفى وسط قاعك يالجزاير
يا عساه بجنة الفردوس ينعم بالرغيد

بين حور العين وأنهار وبساتين وسراير
ماتت الفرحة بصدري ومابقى للعيد عيد

واذبلت كل الورود ويشهد لقولي (يناير)
الدفاتر والقلم والقاف والليل الزهيد

اكتست لون(ن) كئيب وفارقت كل البشاير
كم عجوز(ن) بعد موته صابها وهن(ن) شديد

وكم يتيم(ن) من فراقه منطوي والهم جاير
والمراجل لو نقيسه في سجلّات ورصيد

أشهد أنه في رصيده جامع(ن) طيب العشاير
الأمير ابن الأمير وصاحب الراي السديد

فيه للضيقه حلول وفيه للعثره جباير
من غبائي قلت أبرثي الشامخ الشهم الشديد

وبالحقيقه مايموت ولويدورنّ الدواير
باقي(ن) وسط المحاني وبين أفواه العبيد

ذاخرين اسمه وذكره يوم كل(ن) له ذخاير
بالنهايه ياقصيدي ياعسى عيدك سعيد

ولّا انا بطفي شموعي واكتسي ليل العباير