موسيقى هادئه

مع موسيقى هادئه والضو خافت
الدفاتر رحّبت ... والقاف حيّا

والمشاعر مع سما فكري تصافت
وأمطرت مزن القصايد في يدّيا

والمحاني بغيبة حروفك تهافت
لو بخونك بالقوافي الشعر عيّا

في غيابك صرتلك مليون (عافت)
و(الملوّح .. و(السديري) .. و(المحيّا)

كم سنين(ن) من رصيد العمر طافت
وأنت أطيب أمنياتي ولا إتهيّا

شف طعونك في ضلوعي ماتعافت
وشف زماني كيف زاد النار كيّا

والجروح اللي بقلبي ماتشافت
والخفوق اللي إشتهر بك مات حيّا

والعيون من الحزن وش كثر شافت
من ليال(ن) تركز الأوجاع فيّا

والهقاوي من ليال البعد خافت
ليت قلبي للمفارق .. بس تهيّا!

كان ماعيني ل / باقي البيض عافت
دام ماتملك شعور لا حميّا !!