فمان الحب - نواف المزيريب الشمري

فمان الله يالولو بحر ماجابه الغطاس
فمان الله يا أطهر وأبيض قلب حبيته

فمان الله في دنيا سعيده كّلها أوناس
هذاك الدرب ينتظرك وانا دربي تنصّيته

نهاية دربنا باب(ن) تكاثر عنده الحرّاس
نهاية دربنا لغز(ن) رمعته لكن أخطيته

نهاية طيب ..في صفحة وفا .. وختامها نوماس!
وأدوّن قصه تجمعنا ب كتاب (الصدق) سمّيته

صحيح أستأذنك صعبه!! ولكن يالغضي لاباس
خيالك داخل أعماقي رسخ من يوم خطّيته

وانا يوم أجرع الفرقاورضيت آعانق الهوجاس
وخاويت السهر والنوم هاجرته وجافيته :

عشانك يابعد عمري .. عشانك يابعد هالناس
عشانك يابعد حي الشماااال ويابعد ميته

فديتك زهرة(ن) فاحت وفا .. وإستنعش النسناس
فديتك مهرة(ن) شوفه شفا ..وش عاد لوجيته

فديت الجمرتين اللي يحرسن لمعة الألماس
فديت الوجنتين ولمعة الديجور مع ليته

فديت الطول مع خصر(ن) تمايل ظامر(ن) ميّاس
فديت الزول لو بوصف تعبت أوصف ولا أوفيته

فديت الشامه ورمش(ن) كحيل وناظر(ن) نعّاس
وشعر(ن) ضاعن يديني بظلامه يوم فلّيته

فديتك كلك وكلي قصيد(ن) يرهق القرطاس
فديت كلك وكلي مشاعر لكن أزريته

أجل وشلون أترجم لك مشاعر مالها مقياس ؟
وشاعر جامع(ن) هم الليالي في تناهيته

وأنا ! لامن عشقت أعشق على وضح النقا نبراس
بدوي(ن) لاسمع طاري الخيانه ينتخي ب صيته

ياليتك طيف في بالي تلاشى بحضرة الجلاس
وقلبك ماعرف قلبي ياقلبي آآآآآآه يايته

زمن ! قاسي .. بشر أقسى .. قلوب(ن) مابها إحساس
زمن ! لو نزّل دموعي يسمعني زغاريته

حياتي دامها شادت بجوفي مملكه للياس
أبي تقري نهاية درب على شانك تخطيته

خلاص أستسمحك برحل كما حر(ن) كفخ قرناس
نصيت الدار يوم الدار لوّح لي ولبيته

بقالك كلمتين(ن) تحتهن خط ومابين أقواس:
(فمان الحب) يا أطهر وأصدق قلب حبّيته !!

© 2024 - موقع الشعر