غيمه

لـ مهدي بن سعيد، ، في غير مُحدد

غيمه - مهدي بن سعيد

اضحك يصير الحزن عاده قديمه
ماتطري الا مثل مايطري العيد

اضحك تصير اقبح همومي وسيمه
وابخل يدين الوقت فزعات اجاويد

لاتخفت الضحكه تراها حشيمه
في شالها غيمه تلوح لهالبيد

محتاج لي فرحه تعادل هزيمه
محتاج لي خطوه تمرد على القيد

كم لي مقيم وهالمواني مقيمه
والبحر ماينقص ولااظنه يزيد

حلمي وحلمك مثل عقد ويتيمه
مايلتقون الا بشوفه من بعيد

مابيدها تختار للعقد قيمه
ولابيد العقد يختار له جيد

اضحك وخل الحزن يندب هشيمه
ماعمر يابس يرجع اخضر من اجديد

لك ضحكة ٍ مثلك .. ذرابه وشيمه
دايم تجيني في زحام التناهيد

ياما سرينا الليل كاس ونديمه
اجرها من يد وتجرني بيد

نجلس بريح ماتبشر بغيمه
نقطف مواعيد ٍ .. ونغرف مواعيد

© 2023 - موقع الشعر