يا نجم

يانجم ياللي غبت من غبت ما بنت
وشحال بين أيام مجدك وبينك

الشمس تطلع وأسأل الصبح وين انت
وتغيب شمسي وأسأل الليل وينك

وين إنت أنا منهان منهان لاهنت
منهان من شخص عجز لايهينك

إرجع متى ترجع أنا انهنت وسجنت
واللي سجني كان قبلي سجينك

إرجع ورجّع مجد ماضي كما كنت
ورجّع من المديون للناس دينك

ياقاسي في وجه الأضداد مالنت
ومن صاحبك ينعم بعطفك ولينك

حتى على خصمك من احسانك احسنت
وياماعطت من كل غالي يمينك

بالسيف في شبه الجزيرهة تسلطنت
أخضعت أهلها وملكنه يدينك

مثلك ولد واللّه فلاجابته بنت
لاشك عيّن يمهلنك سنينك

أقولها وين إنت وأنا أدل وين إنت
لاشك من زود القهر قلت وينك

ويا قصر ياللي بدلوا طينك اسمنت
احذر تخون وتنكر أصحاب طينك

اللّه يخونك كان لأهل الوفا خنت
وأوفيت للي بالخفا خاينينك

ياقصر لاتسكن وإن انضمت وسكنت
اخفس قهر واخفس معك ساكنينك

ياقصر مهما زينوا فيك مازنت
زينك رحل وإن عادلك عاد زينك