"ناصر تكلم" - مفرح الضمني

بهذه القصيدة يتكلم بالنيابه عن الدويش في نفس الوقت
يحثه على مساعدة المشرافي ويشيد بقصيدته:

قاف سمعته والعرب سامعينه
يعط ريحه مثل ريح الزبادي

ناصر تكلم باللحون الثمينه
وعز الله انه بالمعاني استادي

غنا بمدح الشيخ وانا عوينه
شيخ يفك موسرات الشدادي

فيصل مثل دره قفوله حصينه
لاحزبو صم الرمك بالعتادي

خاله وابوه بفعلهم جاذبينه
كم شيخ قوم ذوقوه النكادي

دوشان يروون الحراب السنينه
لا جا نهار فيه ضرب الهنادي

هم فزعة المضيوم من ضايمينه
يثنون دونه بالسيوف الحدادي

واللي يجي بنحورهم ساهجينه
يمسي عشا لمكثرات المعادي

كم فارس بسيوفهم ذابحينه
دون القصير ومقرعات التوادي

وفيصل إلى رد البرا خابرينه
كم عايل خلا عظامه بيادي

سيف على روس العدا ناصبينه
والعز فيه ومن تهقواه غادي

يشهد له التاريخ ومسجلينه
والفعل يبقا والعمر للنفادي

ويفوز ابو مطلق على حاسدينه
والله يعزه عن وجيه الحسادي

يحميه حامي نوح وسط السفينه
ويحط له بين العلالي منادي

هو شوق من كن القمر في جبينه
بنت الأماره قاهرين الأعادي

بدوه بالفنجال يا سايقينه
والكيف للي يتعبون الجوادي

وسوقوا عليه الطيب يا مدخنينه
العود الأزرق للحرار النوادي

وارجي من الله كل طيب يعينه
والطيب يشرا والردا مايلادي

هذا كلام الصدق يا عارفينه
الصدق أخير من الكذب والدوادي

وسلامة اللي قولنا حاضرينه
سلام أحلا من ليال العيادي

وصلوا على المختار ياتابعينه
عداد ما ذعذع هواها برادي

© 2024 - موقع الشعر