كبر السوالف

يابنت ياللّي مالك اشباه ياللّي
مكاحلك سودا ورمشينك طوال

و وجهك بشوش وحاجبك مسفهلّي
وخصرك نحيل وقدّك أهيفّ وميّال

وعنقك طويل ونافر ومستقلّي
وصدرك هنا فنجال وهناك فنجال

وسوالفك معها البشاير تِهِلّي
أعذب من النسمات وأطيبّ من الفال

وطبايعك لا يا بعد كل ملّي
أحلى من أحلى شي يطري على البال

أطهر من القلب الخشوع المصلّي
وأصدق من الضحكه على وجيه الأطفال

فتنة حلا مافيك شيٍ يملّي
من جرّتك فالأرض لي حبّة الخال

ويقي من رواق الحنايا وطلّي
على مكانٍ مانزل فيه نزّال

ضلعٍ يرحب بك وضلعٍ يهلّي
تربعي وسطه من الجال للجال

لرضاك ترخص وقفتي في محلّي
ودموع عيني لا تذكرت الأطلال

مدام مطلوبي رضاك وحصلّي
والله لأبيع أبو ريالين بريال

دوسي على روس الظروف وتعلّي
وبيعي لزولي ماعرفتي من أزوال

ياتل قلبي من عراويه تلّي
بين المفارق والظما واشهب اللال

أن كان جيتيني فأنا جيت كلّي
وأن كان رحتي يالله أن ترحم الحال

وأليا نقص قدر الغلا ربع ملّي
غنّي على فرقا المواليف موّال

وأخذي من كبار السوالف وخلّي
ماكل رجالٍ يعوضك برجال