اوهام

ما ني من اللي يقضي العمر باوْهام
ولا ني من اللي يتبعون السرابي

ولا أتبع المقفي ولو عمري حْطَام
أدوس قلبي لو شقيت بغيابي

لي عزةٍ واشيلها بصدري وسام
واصبر على جور الزمن والعذابي

يكفي أماني مالها حد واحلام
ما ارضي بها لو راح فيها شبابي

أنا بشر لي قلب واحساس والْهام
لكن في الحزَّاتْ أعرف صوابي

ملّيت من صبري وباكر وقدَّام
يا رب صبِّرني وخفف مصابي

بين الرجا والياس ساهر ولا انام
تَعَبتْ اردد صرختي في عتابي

خلاص انا ملَيت من تبع لَوهَام
ولا أتبع اللي في حياتي سرابي