راحتين الجود - محمد معرفي

يقولون الغرام اللي نعيشه ذنب ولابه زود
أبتعوذ من إبليس الرجيم وصحبة أعوانه

ولكن!مدري وش عقبه؟وحبل الحب لك مشدود
أتوب ألفين مرة عن هواك ودرب شيطانه

وأجيك محلفك بأني عشقت وبالهوى مقرود
أمانه لا تخلي شفتين الحب ضميانه

حبيبك!والذي سواك شهم والردى مردود
تحيز وش تبي من الطيب فيني تلعب ألوانه

قنوعٍ وأدري إن الجود يا عمري من الموجود
ولكن داخلي بيت الكرم شرعت بيبانه

جواد ماعرف غير العطا في(راحتين الجود)
غني والغنا بالنفس حب اخضر بستانه

واعرف إن الرجل عيبٍ عليه إنه يجي المنقود
ولايفيده بهالدنيا ماغير الطيب وأحسانه

وأخاف من الجهل وأعمل ليوم الخالق الموعود
أدور في أمور الدين لاجل أرضيه سبحانه

ولا أحب الكلافه بس والله ابذل المجهود
للناس الكريمه لأجل قدري يرتفع شانه

ولا أسأل كيف هي بعض الأوادم تحسد المحسود
على أبياتٍ نظمها من هجوس الشعر وأوزانه

وابهديلك حبيبي دفترين من الشعر بارود
إلا منك نخيته بالقصيد تثور قيفانه

أحسك داخلي بأقصى الحنايا مزنةٍ ورعود
أحسك شمعدان الحب والإحساس وأزمانه

لك الله قبلك ودرب السعاده بالعمر مفقود
خفوقي مل من كثر الرجال والعين شقيانه

لك الله مابغيت إلا يمينك والعيون السود
أحبك لا تخلي بي ضلوع الحب بردانه

تدلل وأنت ف(محمد)صغير وآخر العنقود
خذ أفراح العمر والعمر كله وأترك أحزانه

© 2024 - موقع الشعر