بديت بلي خالق الجو والقاع - محمد عجيل الهاجري

بديت بلي خالق الجو والقاع
اللي سجد سبع{ن} وسبع{ن} علاها

الخالق الواحد له الخلق تباع
فدين وتقوى وفرض{ن} وراها

اشكيلك هموم{ن} تعاوى فلضلاع
بين الضلوع الحدب زايدعواها

انا ادري من ينصاك يارب ماضاع
ياعالم اسراري وعالم خفاها

قلبي من الهجران والبعد ملتاع
وونس لهيب النار بقصا حشاها

لي مدتن ماشفتها زين الطباع
اللي خذت عقلي وروحي معاها

ياليتها في داخل السوق تنباع
بضاعتن ياسعد منهو جناها

والله لدفع مالي وشبر فلباع
حالي ومالي كلها من فداها

الجادل اللي عيونها سود ووساع
عيون شيهان{ن} كثير{ن} غلاها

ابو جديلن حاجبه بارق{ن} شاع
يزيدبي نار{ن} تزايد سناها

ابو ثناين كنهن لولو لماع
ابيض من السكر وطعمه حلاها

ريح الشمال اللي براد{ن} وذعذاع
يكفيك عن باقي الهبايب هواها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر