يا الله يا خالق جميع الخلايق

يا الله يا خالق جميع الخلايق
يا خلق تعلم بحال الخليقه

يا فارج الكربات عن كل ضايق
تبرج لقلب فيه ضيقه وضيقه

منها جروح الحب عمق العمايق
اثر الهوى تبطي جروحه عميقه

يا اللي ورا الباب المطرف توايق
لك ويقة واقت على كل ويقه

كنك على ما وسط قلبي تهايق
مدري عرفت السر والا تهيقه

سلام تسليم سليم ورايق
تسليمة من سمعها لان ريقه

قرب شوي شوي واخذ الحقايق
هات الحقيقه وانت هاك الحقيقه

حقايق نكتب عليها وثايق
آخذ وثيقه وانت تاخذ وثيقه

هذا بداية حبنا اول دقايق
يروح كل اليوم كنه دقيقه

القلب فايق ليه ماهوب فايق
القلب ترى ما كل شي يفيقه

خيرت قلبي في جميع الطرايق
واختار ماله غير حبك طريقه

وراعي الهوى تسرق عيونه سرايق
يا اللي سرقت القلب رد السريقه

ان كان طال الصبر ماني بضايق
اخاف مر الصبر ما عاد اطيقه

بيني وبينك لا تشب الحرايق
وغيري وغيرك جعلهم في حريقه

هذا مرد الناس عشق وعشايق
والله يعطي كل عاشق عشيقه

هرج العرب غيرك يجيب الشقايق
ولا انت هرجك هو علاج الشقيقه

اهديت لك بيت من الشعر لايق
يا اللي تليق الشعر يا اللي تليقه

وفتحت قلبي لك قصور وحدايق
في كل قطرة دم قصر وحديقه

الله يلم الشمل لم الحلايق
حليقة مصبوبة في حليقه