الصبر محمود العواقب

الصبر محمود العواقب فعاله
والعقل اشرف ماتحلا به الحال

والصمت به سر سعد من يناله
والهذر به شر وشوم وغربال

ولاخير في اللي مايصدق مقاله
فعل بحالات قصيرات واطوال

وشر أفت الفتى البخل بماله
وشر منه المطل في كل ماقال

البل معلوم بالايدي عقاله
والخيل تزلج بالشبيلي والاقفال

والرجل بالواجب لسانه عقاله
الى قال علم تم لو حال به حال

والمال كثره عار الى بقى له
فضل ومعروف الى نال ما نال

ومن جا جده صار ضده افعاله
ومن ساءت اخلاقه فراقه هو الفال

ومن لايفارق موضع الهم غاله
(فالقهر مثل السيف والحيف قتال)

ومن هاش حاش المرجله والشكاله
ومن ذل ذل وكل من حل بقتال

ومن جاد ساد ومن يشح بحلاله
مدرك مرامه لو صعد مصعد عال

والفقر هدم من براسه صعا له
والجود من ماجود هو ثار بعقال

ولا يفتخر من جاد جده وخاله
هي بالهمم لا بالرمم مثلما قال

الجمر يمسي كالخلاص اشتعاله
ويصبح رماد خامد طافي بال

ومن قلب الدنيا براي الحاله
اخطا وصاب وله دليل بالاقوال

كم خير ما نال فيها سوا له
وكم ثور هور ساعفت له بالاقبال

وكم عاقل به حاذق راس ماله
عقله وكم بهلول عقله جمع مال

السبع رزقه من جيفها ختاله
وجند ضعيف مرغد رزقه اشكال

ومن كور الاشيا بفكره بدا له
ضغاين تكشف خفيات الاحوال

وان قال رجل في عيوبك فما له
وزن ثقل عقلك بعقله بمثقال

وتكشف ضغاين غابته بالرساله
او لفظ مرسوله بعنوان ما قال

ويبين لك فضل الرجل بمقاله
الى جا جدال فيه فض الاشكال

فالصاحب الصافي تحمل خماله
يلزمك والا الضد حده على الجال

واصحا ترى طرد المجفى عذاله
يتعبك والمقبل عطه وجه واقبال

وترى بوجه اللي يودك دلاله
وضده بمن تكره تراهن بالاغزال

واحفظ اوصات اللي نزل بالرساله
واصبر ولا تجزع الى حل بك حال

فالدهر له حال اكتراب وحاله
يتعبك عند العسر في شرب فنجال

كم صيحة ينفك مشكل بحاله
باحسن منه ماعاد يخطر على البال

وان رمت راي فاستخر ثم واله
واعزم وزم وإحزم على الحال بالحال

كم فات حر منصب ما يناله
وكم حصل العليا غشوم بالاجزال

الى صدر براي والشور قاله
ما طاوع ارذال برايه وعدال

ومن يفشي اسراره وقع بالجهاله
واعطا العدا لزمام عقله وهو عال

والسر له خل وثيق صفا له
نقاض مبروم وبالراي فتال

الى احتجت راي من فكر تخاله
يخاطب عواقب كل امر بالاجمال

ويبصرك باشيا مشكلات صحا له
يوريك ما صور على صفحة البال

واشك الاحوال من تحول بحواله
يسعد ويبصر ثم يشرح لك البال

وهذا وكل من ادعى بالكماله
عمى وتاه بظلمة الليل باللال

من اغتر بالدنيا فهو من هباله
ما يعتبر بأجال جولات الاجيال

صولات دولات عصاة مضاله
ملك وحطتهم تواريخ وامثال

ذهبوا وذهب الحال من له وماله
والحمد ويا المجد يبقى على التال

والعمر في زايل لا محاله
وفي الحشر ينشر من عمل وزن خردال

فالله ثواب مثيب نساله
عفوه الى نشر الصحايف والاعمال

وصلوا على المختار والصحب وأله
ما التج حجاج بهاتيك الاميال