يا راكب من عندنا.. فوق عرماس

يا راكب من عندنا.. فوق عرماس
عملية.. قطع الفيافي مناها

تزعل.. إلى نيش المعذر بمنداس
ما اداني المشعاب.. يلمس قفاها

مرباعها.. خشم الحجر دون الأطعاس
ما خايلت مع الرعية نماها

لي روحت مع خايع.. تقل قرناس
شافت مع الصقار.. شلو دعاها

ملفاه ربع.. في ذرا البيت.. جلاس
محوص الرجال اللي بعيد خطاها

ربعة نهار.. اللي خذ العلم بقياس
كم عزبة.. بالكون.. فرق شذاها

مع شافي اللي للمعادين.. نطاس
زين الطحوس اليا تردى جداها

لي جيت قيعي شوق مردوع الالعاس
قل له.. يدور علتي.. وش دواها

قل.. علتي.. حيي تشتت مع الناس
وكل يدور عزوته.. ما لقاها

أرسل علينا الشيخ.. حبر بقرطاس
وابو جليل.. شيمته.. ما رماها

زين المتلى.. يوم الارياق ينباس
لي طار عن بيض الترايب.. حياها

به ذراب.. دز المدرع على الراس
والي قضب حبل القلاعة.. ‘طاها

عاداتهم ..فعل القدايم.. وأهل باس
ولا دوروا.. عقب العطية.. جزاها

حنا نراجي قربكم.. عقب الاياس
والعين.. ما تبكي.. لمن لا بكاها

لو هي عليكم كايدة.. كان لا باس
طروشكم.. عطيوا.. على مشتهاها

أتلوا حمول الخيل.. مهزابة الناس
شيوخ لكم.. عند القبايل ثناها

من عقب ما احنا حصوة بين الاضراس
اليوم.. هتمة سكر.. ما حلالها

حنا الخصور.. مطوعة قاسي الراس
نصبر إلى النفس تلحق هواها

ننزل.. إلى طلب الفراقين.. وسواس
بأرض خلا.. ما كل حي وطاها