يالله يالمعبود يالرب الفضيل - محمد بن دغيـّم السميري

محمد بن دغيّم السميري العتيبي
يالله يالمعبود يالرب الفضيل

ياسامع دعوات من يدعيبها
اقبل دعا عبدٍ تحت حكمك ذليل

يدعيك دعوة مخلصٍ يرجيبها
عفوك وغفرانك وجودك يا جليل

يارب تقدرها وأنا وديبها
واطلبك في التوفيق واهد لي السبيل

يسر اموري سهلها وصعيبها
البارحه ليلي مع الهاجس طويل

اصخر بيوت الشعر واغنيبها
من حسةٍ في خاطري شبت فتيل

يوم السنين ابدت لقلبي غيبها
حوائج الدنيا لصاحبها دليل

تعلمه خبث الامور وطيبها
تعرف بها التقليد وتعرف الاصيل

وتكشف لك أشيا كنت ماتدريبها
عليّ للشدات معروف جزيل

جربتها واخذت من تجريبها
واعدي مع الايام درهام وشليل

اعدي وغيري عالم تعديبها
احط في دنيا العنا هذي واشيل

واشيب عيني ياعمر واشيبها
ابا اعدل الاوضاع ماباها تميل

لكنها مالت فرى الله جيبها
اسقتني الموت الحمر والحنظليل

اشكي على رب الملا تعذيبها
حدتني ظروف الدهر صوب البخيل

واللي كتبله خطوة يمشيبها
مشيت من داري وشديت الرحيل

محتاج والحاجة تحد اصحيبها
والفيت عند اللي عسى شكله قليل

نية هل المعروف ماينويبها
جيته وانا محتاج ومدور حصيل

لي حاجة عنده وانا مرهيبها
لولا ظروف الوقت ماجيته محيل

ولولا علوم عنه كنت اوحيبها
ماهوب من برقا ولا روق العميل

واسمه واسم قبيلته ماليبها
بالكذب ولسانه يسوي المستحيل

وان قلت جيب الشمس قال اجيبها
هراج مراج يميل ويستميل

واللي على نياتها يغديبها
راحت وعوده لي عذاب مستطيل

لاهوب قنعني ولاجانيبها
جربت خلان الرخا يابو خليل

مضيعت هقوات من يهقيبها
ياليت كل اصحابنا سيف صقيل

حتى ليا جا لازم نبديبها
مثل الغريبي وين ابلقاله مثيل

اللي ليا اوعد جابته يوفيبها
حامد ولد حماد ابا الخلق الجميل

الطيبة من خلقته يحريبها
نعم الخليل لمن يحطه له خليل

صداقته للغانمين اوصيبها
صداقته مثل القراح السلسبيل

والعوج للاصحاب ماياتيبها
على العلوم الغانمة حامد وكيل

يوم ان غيره ناس ماتشقيبها
الخاتمة يالله اسالك لا تزيل

شجرة مطاليق غمرني طيبها
© 2024 - موقع الشعر