سمعت لي قافٍ بعيدٍ عن العوق - محمد بن دغيـّم السميري

عويّد بن محمد المطرفي
حبيبتي ياقمّة الحب والذوق

يازهرة ايامي ونبضة يراعي
من كثر ما أعاني من الآه والشوق

عجزت اترجم لهفتي وانطباعي
حبك تغلغل داخل القلب برفوق

وصَلَ مراحل سرّها مايذاعي
ما أغليت مثلك ياهوى البال مخلوق

ابغى اعترف لك والخبر لايشاعي
في حضرتك يستانس القلب ويروق

لكن ليا غبتي شعرت بضياعي
اغيب مع صوتك ليا هل وافوق

وافل في بحر الاماني شراعي
صوتك مطر وانغام وانسام وبروق

تروي حدايق لهفتي واندفاعي
لاتخجلين اسقيني الشهد والذوق

مال الخجل بين المحبين داعي
محمد بن دغيّم السميري العتيبي

سمعت لي قافٍ بعيدٍ عن العوق
قافٍ لمثله ياجب الاستماعي

من شاعرٍ شعره نوادر ومرموق
القاف عذب ومنتجه فكر واعي

المطرفي سابق ولاهو بمسبوق
عويّد اللي لأعذب الشعر راعي

ذكرني اللي مامشت مع هل السوق
بنت الكرام موسّعين الرباعي

اللي عليها لي مشاريه وحقوق
ام العيون الناعسات الوساعي

غيداً عليها القلب من جدّ محروق
حرقٍ مثل حرق النووي الشعاعي

ساقتني الاقدار لديارها سوق
لين إنزعت قلب المحب إنتزاعي

حبيبتي يخضع لها الطير من فوق
يجيلها لو هو من اعلى إرتفاعي

وكلامها يابو محمد لبن نوق
حتى أيش لو يزعل حليب المراعي

سجّيت معها واصبح القلب مسروق
مافادني كثر الحذر وأطّلاعي

ولو هو صحيح ان كل مطرود ملحوق
ماراح جهدي ياعويّد ضياعي

هاذيك والله ياعويّد غرض روق
والبعد عنها موت مايستطاعي

جمالها نادر ولاهوب مطروق
ماهو مثل بعض الجمال الصناعي

ماتشتري حمره ومكياج مسحوق
على الطبيعه ماتعرف الخداعي

© 2024 - موقع الشعر