ألف ميله وميله

كل ما قلت زانت .. شانت أزوَد من أوّل
يا الله إنجد عبادك بالصبر والوسيله

والله ان العذاب بداخل القلب طوّل
كن سَعدي حرام وراحتي مستحيله

أوّل .. أقهر عذابي بس الأوّل تحوّل
وصرت أطيعه.. وأهابه .. وأسمعه.. وأنحني له

من وعود الليالي ضايق النفس (فوّل)
وْلحظوظه حَكايا (ألف ميله وميله)!

والصبر خلّص وياسي على القلب حوّل
والأمل من قديم الوقت .. راعي طويله

كل من شاف ما بي من همومي تهوّل
ثم تبسّم وردّد .. كيف رجله تشيله؟

ياالله انك تقيني كل شرٍ مشوّل
والخطا .. والمهونه .. والفقر .. والفشيله

به كلامٍ يقال .. وبه كلامٍ يقوّل
ومن تبلّى بكلمة جِعل ربّي يزيله

من جِزل بالعطايا ما يجيد التسوّل
والهموم الخفيفه أرحم امن الثقيله

والسؤال الوحيد اللي بفكري تجوّل
ليه نفسي خلاف الخلق دايم عليله؟