نجران الغلا

لعيون ( نجران الغلا) .. جيت ( نجران)
لعيون اهلها ( يامي ... أو غير يامي)

ولعيون ربعي واخوياء العمر ولهان
لعيون كلّ رجال يام الكرامي

سلام ياواديٍ يسمى ( بصيحان)
من (الخانق) .. ل (ضيقه) .. واثني سلامي

جيت انشد (الإخدود) عن ( مرقب العان)
وعن (الحصينيه) ... (وغابة سقامي)

(والابرقين) .. (وبير خضراء) لها شان
عدٍّ يسّقي المرجله كل ظامي

ونشدت ( رجلا ) وين هو (شعب برّان)؟
وذاك الشعيب اللي يسمى (رغامي)

قالت (حبونا) : وقّف شوي .. يافلان
شمّ البختري والنفل والبشامي

ورقيت ( رجم رعوم ) .. إلاّ .. وقد بان
(بدر الجنوب) وشق صدر الظلامي

قلت ايه! ذولا .. يام من قدم الأزمان
قلدّهم التاريخ .. تاج ووسامي

أهل الوفا والطيب .. ذربين الأيمان
دخيلهم في ذمتي مايضامي

ان قلت يام فقل سلايل كحيلان
درع الخوي ومسنده والحزامي

الرجل فيهم لا بدا .. طير حوران
من ماكر العزّه .. شلع .. ثم حامي

تشوف له بالطيب والعزّ برهان
وفعلٍ عجز يوصفه عذب الكلامي

يمنىً بها جودٍ مع طيب وإحسان
ويسراً بها جبر لكسير العظامي

مدحي ليام اظنّ مافيه نقصان
لكل نشمي منزله والمقامي

حناّ على مبدا الوفا ربع واخوان
كان.. ابدوي .. والاّ احضري .. او تهامي

اليا وصلت ليام ماعدت خسران
اقولها صدق ... وعليّ الحرامي

قالوا وش احلى منطقه ؟ قلت نجران
قالوا وش اصل رجالها ؟ قلت يامي