مدح في العلاَمه محمد بن شبلان العضياني

يا راكبلي على أول شد مسماره
مكينتة زيتها اللي من مصدرها

يشتاقله من خطر فالبال مشواره
واليا أشتغل قدم عينٍ شاق ناظرها

توه مجهز على ملفاه من داره
يطوي وساع الخبوت ليا تنحرها

ليا تنهض وسواقه ورا الطاره
البنق كنه بفزاته يغايرها

من عندنا للرياض يقوم بزياره
دارٍ باهلها جليل الملك عامرها

ملفاه شيخٍ شعار الطيب بوجاره
نارٍ توهجر ورسلانٍ مساطرها

والميزة الثانية يفرح بخطاره
قولت هلا مرحبادايم يكررها

والميزة الثالثة يمناه خساره
وقت المواجيب ما يدرا خسايرها

والميزة الرابعة للجاه من زاره
يبشر بقومة رفيقٍ ما يوخرها

والميزة الخامسة فالعرف له كاره
سوالف الطيب عنده من مصادرها

والميزة السادسة غيثٍ على جاره
نفسه على واجب الجيرة مصخرها

وقدام هاذي وهاذي مانسا أذكاره
وأركان الإسلام ما همل شعايرها

يم المعالي هدف مسعاه وأفكاره
رام الجزاله نقاط الضعف نافرها

ناشٍ على الطيب من نعومه أظفاره
والمرجله ما تراخى عن معابرها

هذاك ابوعلي ابن شبلان واخباره
مضمونهاالطيب ماضيهاوحاضرها

من روس قومٍ لجمع الضد قهاره
يوم الفعول القديمه من يجاهرها

لو شب نار أوقدو نارٍ كلت ناره
رامو كبار الداعاوي عن صغايرها

هم ربعنا في صغار الوقت وكباره
وحنا لهم ربع بالنوماس نشهرها

والكل عضيان يوم الفعل وأدواره
أهل فعولٍ تنومس من يسطرها

قبيلٍةٍ في سنام المجد وأوكاره
الفعل في قمة التاريخ شاهرها

في حاضر الوقت للوقفات حضاره
يرهي على الطيب عانيها وزايرها

ويوم المناويخ والغاره ورا الغاره
تشبع جياع الذيابه من عثايرها

يفرح بهم من عليه السود دواره
وكم من ليا عمست الأريا يشاورها

هداتهم في نهار الضيق جباره
وفعولهم فالعدى تصعب جبايرها

متيهت في خمايل نجد واقفاره
لقح النياق المزايين وعشايرها

ترعا بهيباتهم للخوف منداره
من شاف للوسم ينكف ما يذيرها

لو جيت أبا اشرح يضيق البوك وأسطاره
أوجزت لفعالهم والكل خابرها

أجهدت والعرف ما يعرض لتجاره
فأبيات من قدر منصاها مقدرها

ما قلتها أرجي وراها مد وتجاره
مير الحقايق يشوقني تدبرها

حقائقٍ ما تحققها هل الباره
اللي تعاكس مخابرها مظاهرها

ناسٍ تبا الطيب وهيه عنه منهاره
عوق لرصيداتها عوق لعمايرها

والطيب ما يدركه من تجذي أشباره
عيطاًً تلوذ النوادر في معاسرها

وأبا أكتفي عن طوال القيل بقصاره
طرايفٍ من ملافي متخيرها

نوادرٍ من ثمين الشعر مختاره
حيثك تليق ابك يامحمد نوادرها

واعداد من حج بيت الله ومن زاره
صلوا على مسس الدعوة وناشرها