قلبي لأهل بيض الطواريق ميلاف
واليا جزع من شي مثل القديحه
ياجعل من يصبر لياشاف ماعاف
يذهب ذهاب الكهربا فالشريحه
مانيب مجبور على سود الالجاف
عيني معي والارض قدمي فسيحه
قم هات من بيض الورق يابو نواف
اكتب بيوتي كود غيضي تزيحه
خل القلم بصدورها يرعف ارعاف
اترك هزيل القول واكتب صحيحه
نوادر ماخذ عليهنه اصناف
ولااكشف بهن سر المزايا القبيحه
ابدي بهن عن الردى راس مشراف
والبال عن مايزعج البال اريحه
مرظا علي ولا على غيري اجحاف
وعرض العباد الغافله مستبيحه
لي منهج فالشعر ماهوب زهاف
بالمعرفه لي هدتن في مليحه
من منهله قطاف مانيب غراف
اميح لزلاله وغيري يميحه
مااقول انا العارف ولافيه عراف
من قال انا مافاد نفسه مديحه
مير ان بعض الشعر مختل الانصاف
لاحل وضع ولاعباره صريحه
زورق بحر من غير دافع ومجداف
يقفي ويقبل في اتجاهات ريحه
سراب يلمع له ويسبح على اطراف
بلاقع فيها الموارد شحيحه
لاوالله الا خالف الشعر الاشفاف
وتلاشت اوضاعه وسمعوا فحيحه
من يوم كلن قال انا صانع القاف
وأفكاري اللي للقوافي نطيحه
واليا بدا قام يتغريف تغرياف
بصوته تقول انه يقلد مديحه
مثله عسا شعرن يغنيه مذلاف
ماتنكره فرقا الصميل ونضيحه
ينعاف وأفكار تنميه تنعاف
ونشره بصفحات الصحافه فضيحه
الشعر قسم منهجه حسب الاعراف
اما بوصف الحال والا نصيحه
وشعر الوطن حق علينا وميقاف
من كل عصما يستحق القريحه
وشعر الفخر واظهار ميزات الاسلاف
وأهل المواقف والقلوب النصيحه
وشعر الطبيعه والتغني بالأرياف
وصف المعالم والمراعي المديحه
اللي ليرواها من المزن خذاف
لبست من ألوان النبات المليحه
ليا توالت وأول البرد قد طاف
النبت عانق روس رمثه وشيحه
ليا حل في قطعان الأبواش خفخاف
اقلوبها وقلوب أهلها جريحه
تبي فياحن غاد ألوان وأصناف
عقب السنين اللي عليها مجيحه
ليا شرعت والنبت غاد له احفاف
جاين لنواره على القاع ضيحه
عشاقت الصحراء وشرهات الأوصاف
هاك النهار قلوبهم مستريحه
هاذي مزايا الشعر سامية الأهداف
ليا جات جزله والمعاني فصيحه
ماهوب شفت عيوب وفلان ماشاف
وكشفت عن غرة فلاح وفليحه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.