غــــــــــزو العـــــــين

قدام رمشك وغزو العين والشفّه
هذي مساحات قلبي واستحليها

استعمريني من الضفّة إلى الضفّه
حتّى كريّات دمّي استبيحيها

القلب راضي بغزوك لو لقي شفّه
عاشق.. ويهوى من الدنيا بلاويها

اخذي بقلبي وأرجائي مئة لفّه
شوفي المحبه بقلبي وين اخبيها

يا لله أسريني.. وحطي قيدك بخفّه
ولا قلت لك حرريني..لا تسوّيها

ما حد غيري لمحتله يمدْ كفّه
فرصه وجاتك إلى عندك برجليها

لا جيت آقاوم حلاتك مالت الكفّه
صوبك فديتك وانا وياك اعلّيها

قوات حبك حوالي القلب ملتفّه
كلما أحاول أفرقّها تصفّيها

لاجيت باصد صفّه جاتني صفّه
تجتاح ارضي وانا اتفرج واخلّيها

واقف مكاني كما الاطرش وسط زفّه
عاجبني غزوك مع اني رايحٍ فيها

مادام ربي عطاك الحسن والعفّه
دكّي حصوني يا بنت الناس..دكّيها

واستعمريني من الضفّه الى الضفّه
حتى كريّات دمّي استبيحيها