طريق الحب - مجبل الحشاش

عزاه ياقلبن من الزين مجروح
عزي لقلبن من هوى البال عدمان

مجروح قلبي من هوى خشف مملوح
جرحه ابقلبي خافين تو مابان

جرحي سطا بالقلب من منوه الروح
الصاحب اللي شب بالقلب نيران

ودي ابشوفه شوفته تنعش الروح
عز الله اني لشوفة الزين ولهان يازين

شغلي عقبكم سهر مع نوح
والدمع من عيني على الخد ودان

هاذي سواة الحب دايم على الروح
يلعب بها بالكيف في كل ماكان

الحب يرميله مضاريب ويشوح
وراعيه أنا بقول والله حسران

حاله مع الأوهام وان كان بيروح
ودايم على ماقيل بالليل سهران

ياويل قلبي مسكينن بالأشباك مطروح
عز الله انه ياعرب دوم مرضان

الحب يأهل الحب له درب مشروح
ولا كل من دشه يجي فيه فنان

بعض العرب يمشي على غير مصلوح
امعذبن نفسه ولا حوش أثمان

راع الهوى لو كان يلتف مفضوح
لازم ايبين تقل به كل نيشان

الناس لازم يكشفوا كل منضوح
مع التجارب يكشفوا كل ماكان

الرجل ماخلوه يوم كان مسدوح
قالوا تعالوا لازم أنقعدا فلان

© 2022 - موقع الشعر