طريق الحق - عامر بن نوطان

يا الله يا مدير الهبايب والافلاك
ياللي دبيب الذر ما هو بخافيك

ألطف بعبد يطلبك ويترجاك
لا غافل عنك ولا هو بناسيك

خليك يا بن آدم زهيد بدنياك
أرزاق بقعا لا تغرك وتغويك

إن اقبلت تاتيك باضعاف الاسلاك
وإن دبرت ما عاد تسمع مناديك

لو ساعفت لك ساعة تقطع رشاك
واتيهك عقب المعزة وترميك

اللي وطا غيرك من الناس يا طاك
ما مر قدامك على الناس ياتيك

أما هلك تصبر على حر فرقاك
وألا أنت تصبر عن حبيبك وغاليك

وتعيش وحدك عقب من عاش وياك
تبقى وحيد دمعة الورع تبكيك

لا تتبع الشيطان باهداك وارضاك
يصبح مصابيحك ويمسي مماسيك

للشر مفتاح وللخير صكاك
يغويك ويضلك وللشر يهديك

خل اتكالك واعتمادك بمولاك
اللي إن وفيت انجاك وإن خنت يهفيك

الرزق عند الله وما كتب لك جاك
لو يعلنون الناس عن قطعهم فيك

لا تقول رزقي عند هذا ولا ذاك
رزقك على رب يميتك ويحييك

لا تحسبن الله يخلقك وينساك
رب عليم بك ويعلم مماشيك

إياك عن فرصة شبابك تعداك
تمرك أيام تذكرك ماضيك

لا تنهر السائل إلا ربك اغناك
ما تدري أن الله بحقه موصيك

ما قدمت يمناك لله يلقاك
ما عاد تلقى كون ما مدت ايديك

بالموقف اللي فيه تكشف خفاياك
في ساعة ما عاد ينفع محاميك

ما تذكر اللي كان قبل امس وياك
لا تحسبن اللي غدا به يخليك

وين العمام ووين باقي دناياك
وين الصفوف الماضية وين اهاليك

إذا دناك الموت قربت مناياك
لو كان خلانك وربعك تباريك

الموت حق ووين ما رحت يلقاك
لاتحسبن كثر الحذر منه ينجيك

ما ينفعك لو كان طولت مسراك
يا هارب من قدره الله تلاقيك

مما كتب لك لا تكلف مطاياك
هذا طريق الحق ما فيه تشكيك

حقك من الدنيا إلاالله توفاك
ثلاث وارات من الخام تكفيك

وشاولك فوق اكتافهم صوب مثواك
وخلوا عيالك والقرابة تعزيك

أتلى العهد بك يوم حطوا رزاياك
خلوك ما عندك رفيق يسليك

ذي تربتك من رملها ربي انشاك
منها خلقك الله وفيها يوديك

إن الله انس وحشتك زان ممساك
وأنور لك المظلم ورفعت مبانيك

يوم الوعيد اللي تحسب خطاياك
أما شقى للنفس وألا تهانيك

تاتي الضعوف وتاتي أصحاب الاملاك
وياتي الملك والشيخ قبل المماليك

تفلح إلا حطوا كتابك بيمناك
وإن حط في يسراك عظمت بلاويك

خازن جهنم قال هذي عناياك
أزريت واليك امس واليوم يزريك

وتعزل مع اهل الشر والنار مأواك
لو صحت ما به من يلبي مناديك

تم الكلام ويا الله اليوم تقواك
عسى عملنا يوم نلقاك يرضيك

يا ذا الجلال اللي كبار عطاياك
ارحم فقير لايذ بك وراجيك

© 2024 - موقع الشعر