انا مليتها اعذارك

لا تعتذر لي أنا مليتها أعذارك
ولعلمك الخاص منّك غاسل إيديني

مافيك طبٍ ولا تدري بهوى دارك
شيبت راسي تبي تلحق على عيني

الله يغربلْْك وشسوالك مبارك
وش جاك مني علامك يامعنيني

تزعل تقاطع وتقطع عني أخبارك
ترضى / تجيني إذا لك حاجةٍ فيني

وإذا قضت حاجتك كملت مشوارك
وأصبر رجا مير ماأظنك تراعيني

أدري بك تْظن وتصدق بها أفكارك
إنك على قد عقلي قمت تعطيني

ماتدري إني أعْرفك وأسبر أغوارك
مافيه شيٍ على ماقيل خافيني

أسقيتك الشهد يامسقيني أمرارك
اليا متى وأنت بسْواتك مشقّيني

لا تفتكر طحت ياالمغرور في نارك
ولو طحت ربي بعد عيني ينجّيني

من صالحك تتركه طيشك وإصرارك
لا تستفز الجروح وضيعة سنيني

يشفع لك القلب يومه هام وإختارك
والعشره اللي مضت مابينك وبيني

إحذر وأحّذرْك من نقصان مقدارك
ياويلك الويل لا ثارت براكيني

لا تعتذر جد أنا مليتها أعذارك
إفهم لأ نك بعد ماعاد تعنيني