اشوف اعيال حارتـنـا واقـاربنا ياوي اعيـــــــال - ماجد بن مغيرق العصيمي

اشوف اعيال حارتنا واقاربنا ياوي اعيال
بمظهرم ومنظرهم والجوهر يجلب الريبه

مهما نشجع وننصح على التعليم ماش اقبال
وعند الامتحان يبين التقصير والخيبه

تركد ياطلال ولاتصاحب شلة الانذال
نصيحة واحدٍ ينصحك من واقع تجاريبه

يقولون الرجال اهل الفهم ترى الرجال اشكال
رجل ترتاح له والاخر يحق لك تجنيبه

فيهم صندوقٍ مقفل بفولاذٍ من الاقفال
ما تشره في مفاتحته ولافرة لواليبه

وفيهم جاهل مغربل حياته حياته كلها غربال
دايم نفسه مزايمته وافكار الجهل تدويبه

برايه منفرد مايسمع الناصح ولا العذال
سواة الساذج اللي عقله الجاثوم ساريبه

متى يتبين الرجال للسائل هنا السؤال
من المنطق ورأس لسانه الى قام يهذيبه

تعرفه من علومه مايبي لك نشده ودلال
عنوانه منطق لسانه يظهر صدقه وتكذيبه

يجيك غليمٍ مغتر في زوله وفيه اخبال
مغرور والده ما حسن بتربيته وتأديبه

الى ناظرت بالصوره والزول من اكبر الازوال
ولاحققت بالنظره ظهرماكان يخفي به

في المظهر ليا منك لمحته بالنظر رجال
وفي الجوهرصفر لو طول اثيابه واشانيبه

الى جاءك يتمايل بالعباه ونكس اله عقال
وخش المجلس وعدا يبي مركن يتكي به

وهو من خاملين الذكر ماله قيمه ومنزال
لبس ثوبٍ ماهو ثوبه وهو معروفٍ ثويبه

طلع عن حجمه وتالي زمانه صار فيه اهبال
طوير الحمرا تالي زمانه يلوي اذنيبه

لو توديه سوق الرق مايسوى هلل و ريال
ولاحدٍ يلتفت له بين بايعبه وشاريبه

ياليت الله خلق للخبل في وجهه علامة خال
علامه يعرف إبها بين خلانه واقاريبه

مثل خطو الهبيل اللي لسانه بالهذر ختال
قبل يكشف عيوب الناس اولابه يكتشف عيبه

بكره لاقرب الميزان بيوم العرض والأهوال
يعض ابهامه ويندم الى عرضت مكاتيبه

مافكر كيف مظهاره قبل يقدم على المدخال
ولامنه تندم قام ينفض ثوبه وجيبه

عسى فاله نهار العرض ماهو للصديق بفال
هذا خسران بالدنيا وباخرته عواقيبه

الى عرضت موازين العمل والعدل والمعدال
احدا ترفع موازينه واحد للهوى تهويبه

وانا مااقصد بها زيداً ولا عمرا ولا هلال
حديث المجتمع في كل حي وبيت نوحي به

ولاحد سالم من الناس ذا طيب وذا بطال
لكن الطيب تغطي مزياه لعذاريبه

واهل العقول في راحه والعقل زينة الرجال
وان زال العقل لاهامة ولا وده ولاجيبه

العاقل يعقل لسانه ويخشى العالي المتعال
مثل ماكون ابن ادم باحسن صوه وتركيبه

وانا من صغرتي مارتاد اوكارالقيل واهل القال
واهل المجالس اللي تجلب الي الشك والريبه

مثل ماقال الاول كان مانته للحمل شيال
جنب عن صحبة النمام ولا تشذب عراقيبه

واختمها بطلبة خالقي في صالح الاعمال
ومن يطلب ولي العرش ماخابت مطاليبه

بصلاة لي وتسليمه عدد مايمطر الهمال
على شفيع كل الخلق اللي مزاره بطيبه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر