ورود الحب

أبسأل عنك يا اجمل من سكن هالقلب وضلوعه
وابروز صفحة كتاب الغلا باسمك مع أوصافك

واقول أهواك لانك في حياتي صدق مزروعه
على احضان الحشا تنبت ورود الحبّ واطيافك

أبفرح لجلك ولجلك باعوف الحزن واللوعه
واشق القلب وازرع به ورق من عود غريافك

واعوم بشعرك اللي هو سواد الهمّ في قوعه
ياشيخة غيد قد مرّت على المحجر شرى أطرافك

زبرجد..سوسن وفرعا.. عويدة بان ..دلّوعه
تمر بالخاطر اشعار الغزل والمدح لنصافك

ياورده بين وردات الحشا .. يالقمرى يالرّوعه
تعالي القلب عرشك من هذاك الوقت لي شافك

تعالي لي (حياتي ) لاتخلي القلب في روعه
واسلّم لك خفوقي لو بغيتي القلب مضيافك

نعيش العمر كلّه بالفرح ونودّع ادموعه
يابنت أجمل مدينه بالحسن والحِسن لفلافك