ألف ميل

لـ فهد معتوق، ، في غير مُحدد

ألف ميل - فهد معتوق

تعتقد من كثر صدّك ببتعد عنّك و اميل ؟
حب كوعك .. هذي اسهل .. خذ من ابياتي الجواب

لو بعادك عني ( واقع ) .. بعدي عنّك ( مستحيل )
ما يعثّرني غيابك .. لو يصير اسمك ( غياب ) !

ما عشقتك لجل اعوفك .. حط في قلبي و شيل
صير للمحروم حلم و صير للظامي سراب

روح و ارجع روح و ارجع يا عسى عمرك طويل
و اوعدك ما راح تسمع مني اي كلمة عتاب

صاحبي و ان كان موتي منّك .. بحقي قليل
ودي احيا في عذابك .. و اقضي شيبي و الشباب !

أتبعك لو قلت هذا الكون شكله مستطيل !
و أجمعك لو صرت سكّر وسط كوب الشاي ذاب !

خذ من المجنون حكمه فيها تحريف ٍ جميل
ما يحرّفها جهاله .. ولا يصيب الا الصواب

اصلا المشوار ( خطوه ) تبتدي بعد 1000 ميل !
و دامه اختارك عذابه .. ظلم تحرمْه العذاب !

© 2024 - موقع الشعر