سلام الله

سلام الله على اللّي هرجته بالحب مكتومه
بصيرٍ بالكلام ولا تنطّق منطقه حالي

يسولف له على ناسٍ ولايدرون بعلومه
ولا منهم حدٍ يفهم معاني هرجه التالي

لأن الهرجه اللّي جابها المملوح مقسومه
عطاهم مجمل الهرجه وفيها رمز غربالي

وأنا اللّي مثلهم مايفتهم للرمز مالومه
سمينٍ مستريح البال عن درب الهوا سالي

ماهو مثلي شعا قلبي سوالف زاهي أرقومه
بمبدا الهرجه أبعدني وتالي الهرجه أثنالي

مليح الزول حبه بالضماير بانت رسومه
هجوسي له تودّيني ولاجن أشغلن بالي

قعد قلبي يسولف به لو أنّه في حلا نومه
صحيح القلب ما يلعب به إلا واحد غالي