أمسيت بي

أمسيت بي من همّي افكار
وافضيت ما بالجاش مخفيه

وفي خافق المعلوق بي دار
دولاب من مكنوني افضيه

بحرٍ غزير أو مويه اكبار
وتيّار قوعه ينطبع فيه

الاّ ان جبرني شي جبّار
عندي يهون الشّفّ غاليه

بينّت لي يا ذخري اسطار
ومن صرّح الشّكوى نلبّيه

لمحبّ يا مشكاي صبّار
يسمح لخلّه لو خطا فيه

ويجيه بالمشيه ولاعذار
وامّا بغى م الشّي يعطيه

والحب همّ أو سمّ واعزار
ولازم ايدوس الحكم راعيه

إلاّ ان رضى بصدودك امرار
اترك هواه أو لا تصافيه

خلّه ولا تسمع له أخبار
حتّى يلين الصّخر جاسيه

وان ردّ لك بالعذر واختار
منك الرّضا رحّب ابوافيه

طير الخلا ما يقضي الكار
يا غير طيرك لي تربّيه

لانّ الهوى له جند وانصار
الحق تاخذ به أو تعطيه