يــا مـحـبّ

يا محبّ يطلب الرّدّي
لا تلمونيه على اطاها

هوب مجفي عنك ومصدّي
لا حشا وكفيت لبواها

غير شغل الوقت والبعدي
لدّ نفسي دون منواها

تشتكي من لاسع الودّي
فيك والخلاّن فرقاها

من مصابك في الحشا عندي
لوعةٍ في الكبد تقلاها

لا تبيح ابخافي السّدّي
للحسود أو حذرك اعداها

والحبيب اللّي لك امودّي
لي بحبّه روحك اشقاها

وابتلاك الهمّ والسّهدي
في عيونك انهرق ماها

لا تطاوع م الملا حدّي
فيه لو تعدم بقاياها

يعل عمرك دوم في سعدي
والعنا والهمّ تكفاها