تفهق يمينك عن محياك غره
وشوفتك تفهق عن حياتي خطرها
ياللي تمر البال ياللي تمره
وين أنت يانور العيون ونظرها
وين أنت ياجم الجمال ومقره
ياللي شبوحك ساكنتني صورها
تعال لم واعتب علي وتشره
تعال ياورد الحياه وزهرها
وارسم تباشير الفرح والمسره
وامسح عجاريف الزمان وكدرها
ماتدري إن العمر فالعمر مره
ولاتدري إن النفس عافت قدرها
داله وأنا اللي مع نجوم المجره
في ليلة ٍ ماأسرج سماها قمرها
أرقبك والفكرة على الكيف حره
ماعاقها الهاجوس وإلا حصرها
راحت تسوق القاف مدري تجره
والسحر مرساها وفكري بحرها
تومي على راس الغرير وتغره
وإلا غزير العرف مايحتقرها
ليا ضيقت جول الصدور الأزره
كم من مسيلة سيلها ماحدرها
وكم خالفت خطو العطوف المدره
وكم غيمة ٍ ترعد وتمسك مطرها
ياغرسة ٍ غراسها ماتسره
كم غرسة ٍ تغرس ويجنى ثمرها
ماكل من غاص البحر جاب دره
ولاكل من قال المعاني صخرها
والهاجس اللي جر الأشواق جره
هاض المشاعر لين فجر نهرها
والشعر أنا قد عفت خيره وشره
من ناس ٍ يقدي عماها عورها
خلوني أقفي عنه حلوه ومره
لو هو على صاف المشاريب يرها
واليوم مافي نقض فتلي مضره
لا صرت أبا اوجز كلمتي وأختصرها
وأقول خل الشعر للي يبره
اللي عنود الشعر عنكم حجرها

حقوق النشر محفوظة لـشاعر

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2004 - 2019 - موقع الشعر