منزال ربع كـل ابوهـم قرابـه - غازي بن مهنا الشيباني

كريم يابرق بعيد سحابه
جعله على هاك المشاريف صباب

جعله على المشقوق يسقي ترابه
ويسقي سحيله والينوفي وعباب

والهضب من سيله تدفق شعابه
دار يحن القلب يمه ولو غاب

دار بها تسمع تعاوى الذيابه
فيها النبشتي ما يوقف على الباب

منزال ربع كل ابوهم قرابه
ما بين عم وخال ما فيهم اجناب

قلبي كما دلو تجدد خرابه
يقفي ويقبل بين غارف وجذاب

دلي على عد قليل شرابه
لاروى الهليك ولا لقا عنه مجناب

شفي بمشقوق جديد خصابه
فيه البيوت اللي تبنا بالاطناب

اخير من قصر الا صك بابه
اليا لفاه مسير من هله هاب

سلم الحضارة خاطري مارضابه
لكن اطيع الوقت والوقت غصاب

كل على ما قيل وقته مشابه
وانا بوقتي سرت والكيف ما طاب

قلب ذكر ما ضيه جدد عذابه
والراس من كثر التفاكير قد شاب

© 2023 - موقع الشعر