يوم نصف الليل الأول تزهب للرحيل
قمت اثور في همومي وافك عقالها
قبل خيط الفجر يطلع سريت بلا دليل
ما انثنيت وكل عقده لها حلالها
رأس مالي حلم والعمر مشوراه طويل
والليالي سعود والمقبلات بفالها
ضاعت احلامي هقاوي وانا عبر سبيل
كل ما خميت فرحه صفقني جالها
نوختني غبر الايام في درب المسيل
ثم هلت فوق روحي صدوق خيالها
رحت انا والحزن ما بين حط وبين شيل
والليالي جابت قصارها وطولها
ما بقالي في حياتي كثير ولا قليل
شوف عيني يوم قفت تمس حبالها
شوق قلبي يصتلي نار وضلوعي فتيل
ما لقلبي يا حمد حيلة يحتالها
اتعشم في زماني واثر وقتي بخيل
حدني للشمس من عقب ذقت ظلالها
عمري اللي راح نصفه نهار ونصف ليل
وشرهتي عامين تبكي رسوم أطلاها
فاحت جروح الوفا ريح طيب وريح هيل
والضماير من عناها تفوح دلالها
الجروح المبطية دمها الطاهر يسل
تعتزي في عمها واعتزت في خالها
حاجتي يا سود الايام مسراح ومقيل
واتعدى الحروة اللي عثر خيالها
والله إني ما حني الراس لو حملي ثقيل
موت نفس بالشرف لو تموت اشوالها
يوم بعض الناس وإن مالت ايامه يميل
ما تزحزح لين مكه تزول جبالها
ماقفي يا سود الأيام ميقاف الصميل
قوله رجلٍ يحتمي كلمته وإن قالها
الثقيلة ما تحمل على الظهر النحيل
ما يشيل الحمله إلا ظهور جمالها
عاتبوا رجلٍ عن المرجلة قلبه ذليل
كل خمله يعترضها يجي مشتالها
عزتي ما أرضى بدلها من الدنيا بديل
والعلوم الطبيه يا حمد نسعى لها
والله إني من قبيلة وذلي مستحيل
عزوتي قوم تفاخر بروس رجالها
ما لحسادي علي معروف ولا جميل
كل هقوة عارفٍ دقها وجلاها
يا حمد وكلت ربي ولا غيره وكيل
عالم باسرار نفسي يرف بحالها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين