البارحة ما مسيت - عواض معيض الخديدي

البارحة ما مسيت عيني تكالي
في ديرة مالي صديق واقاريب

جاني علوم في منامي توالي
واحلامنا فيها هموم وتراعيب

سريت افكر في زماني وحالي
شي لزمناها وشيات بتغيب

وعجزت نلقى للتعابير والي
والراس له بين المدارات تقليب

هذا ويا راكب على اللي تمالي
في مشيها تغلب جرى الطير تغليب

تمشي من المندق بلد كل حالي
بعد الصلاة وحزة الفجر تزهيب

لا تلتفت يا سايق الدرب طالي
والخط مثل الداب ما له صواحيب

يا كم قرص من كل ذرب وغالي
والموت واحد لو يجي له تسابيب

مضواك في الطايف على كيف بالي
تلقى الرجال اللي تهز المشاعيب

تلقى ولد عمي صلاح الموالي
تلقاه في بيته كثير التراحيب

ما هو من اللي يشعلون الفتالي
مشهور بين الناس بالخير والطيب

قل له ترى خطك وصلني وجالي
وعرفت ما قالوه من كثر اكاذيب

اطلع ورح للشيخ في كل حالي
قل له ترى عواض في ارض الاجانيب

مبعد ولا يقدر يجيكم محالي
ملزوم في رزقه وانا له مناديب

خصه سلامي بالوفا والكمالي
واعطه علومك مع كثير المعاتيب

والعلم عنده يعرفه لا يبالي
يختم على علمه بختم المواجيب

وان شفت بعض الناس يمشي يلالي
ابعد عنه جهدك ولا تامن الذيب

وانته من اهل الصدق مانته شمالي
والصدق ينجينا من اهل المناشيب

اهل النشايب سهمهم دوم بالي
وسهومنا دايم تعلى المراقيب

حنا هل الشيمة مقر النوالي
ماضرنا هرجه رموها المعاطيب

نمشي على وضح النقا والعلالي
ما نلتبس بالغدر ثوب الهذاريب

يالله يا للي تظهر الحق عالي
تكفي عبادك من سموم العقاريب

© 2024 - موقع الشعر