البارحة انا امسيت اكالي في الليل
واساهر الجوزا واراقب في سهيل
واصبحت وانا بين عدل وتمييل
والقلب كنه في اللواهيب تصلاه
امسيت اساهر والعرب نايمني
واداير افكاري شمال ويميني
من واحد جا ما حسبنه يجيني
غير شعور القلب والبال عناه
وقلت وش ذا اللي في الليل جاني
وين اتجاهك ياهذا المودماني
انته من ارض الشام والا يماني
وين اتجاهك وين قصدك ومعناه
وقال انا لو كان ما بيك زليت
ان كان مانت فلان والا تعديت
لكن قم رحب وانا ضيف حليت
والضيف له واجب على الناس تلقاه
وقلت لا جا الضيف يا مرحبا به
القرص يكفي والصحن والزعابه
ماحد عن الضيفان قد صك بابه
في ديرة ما حصل الضيف جزاه
وقال انا ما جيت ضامي وجيعان
من السراه اللي على العز مزبان
أرض ترى ينشط بها كل كسلان
في ضلع يكفيني مراقيب مبداه
وقلت وش جابك في الليل ساري
تطا الحصا والشوك في ذاالصحاري
ارض بهاالعقرب وفيهاالثواري
والدرب غيرك لامشى فيه يغواه
وقال مسراي لمغيبك ومقفاك
شهرين ادور لك في البيت مالقاك
ما حسبك تنسى ارضك وربعك ومشحاك
كماك مايقفي عن ارضه ومشحاه
وقلت انا ماني مسفر ومطرود
ولا عليه شرط بين ومحدود
موقف شرف للروح بالفعل موجود
وكل ما يحتاجه القلب يلقاه
وقال مارزقك على ذا الوظيفه
اللي رمت بك في الديارالمخيفة
لا جوها ناصح ولاهي لطيفه
والرزق للمخلوق مضمون مجزاه
وقلت انا ماني موظف لحالي
ولا الوزارة جات على كيف بالي
تبي تودينا يمين وشمالي
في مملكتنا الامن ربي اضفاه
وقال مافي القنفذة لك ولا فيد
الا مهاجر في قنونا بني زيد
لكن هيا اطلع معي ديرة خديد
الظفرعزه بين ربعه ومرباه
وقلت لا تتعب في العلم لا فات
والقلب عاف وراحت علومه افوات
وانته تفكر فيه للهم اشارات
محتار فكره في زمانه وبلواه
وقال هرجك كل ها لليل فاضي
ابيك تمشي بالمحبة وراضي
من غبر اروح لشيخ والا لقاضي
وانا ترى ودي بخاطرك ورضاه
سار المجادل لين حتى بدا النور
والكل منا قام ضايق ومقهور
لا جا فوات ولا حد راح مسرور
والليل غلق ما وصل علمنا اتلاه
هذا وما رد الخديدي و ما قال
في حلم ليله كلها جيم وسوال
فكر وحكرواختصر بعض الاقوال
والباقي الله مطلع به ويعناه
والختم ذكرالله عدد ذكره الزين
وعداد ما صعد منى من ملبين
وعداد ما زارالنبي من محبين
وعداد ما ربي خلق خلق واحصاه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر - بواسطة شركة المبرمجين