حبّ عكس النــاس . ! - عناد المطيري

تحبّني موت ؟ ، لا والله احبّك حياه
حتى إذا مت احبك ياحياتي هناك

اغرورقت بالدموع اعيونها قلت : هاه ؟
انا ابي ضحكتك مابي ملوحة شفاك

تناغم الدمع والضحكه ورا نبرة آآآه :
جنّنتني فيك حتى صار مالي سواك

امانه ارفق على قلبي وخلّلك معاه
تراه لو سجّ لحظه كان يركض وراك

ضحكت ، قلت انتي اقسى ذنب واسهل نجاه
ماادري وش اللي يخلّيني ادوّر رضاك ؟

تدرون ليه القساوه ؟ بس شدّ انتباه
حتى تعود ال" طبيعتها " شبيه الملاك

ما ارقّها وان نست حزن الحياه ال:حياه
تنسيك حتى الحضور اللي كساه ارتباك

© 2023 - موقع الشعر