بين عمير الروقي و عبدالله السلوم التميمي - عمير بن زبن الروقي

هذه قصيده وجهها الشاعر عمير بن زبن
البراق العتيبي للشاعر عبدالله بن عبدالرحمن

السلوم التميمي :-
مضالي ثلاث سنين ماشفت زوله

اولا شفت ديرتها ولا جيت حولها
انا اتلا العهد فيها وهي عند بيتها

تلفظ بجملة لي وانا مثل اقولها
تمسك بعز النفس والصبر والوفا

ولا تسمع النمه من اللي يقولها
واشارت وداع وصرت انا عقب ماختفت

انادي ودور وين جرة ذلولها
لعلي مع الجره ولو عقب ماختفت

اكون الموده قد وفيت بوصولها
تبعت الاثر من شان اناظر لغايتي

فتاة ٍ غذا روحي ترى شوف زولها
لاشك الدهر والبعد قد حال دونها

وهي روحت ماكل شخص ٍ يطولها
فتاة ٍ سبت عقلي بسحرن بعينها

عريبه شريفة والمعزة تعولها
فتاة ٍ بها عذروب هو نحل خصرها

وجديلينها بالارض لولا ان طولها
نهضن وصارن ياصلن نصف ساقها

فتاة ٍ علي اظن صعب منولها
اجادت بكيه نجضتها بخافقي

حشى لو يجي كل البشر ما يزولها
لحيث انها داخل افوادي تمكنت

فلا تنذبل لو حاولوا في ذبولها
ولكن يا بن سلوم من عقب ماجرى

هواجيس قلبي جت من الله سيولها
وقفنا على الخضره وصديت يمها

ولكن رأت عيني بها ما يهولها
حمار ٍ نظرته صابغ في كفوفها

وانا عنه ماجاني خبر من رسولها
تنشدتها خضبتي الكف عقبنا

واجابت حشى لله وابدت ذهولها
لما قلت ثم اغضت وصدت تقول لي

تذكر نهار الشمس قرب نزولها
على الغرب يوم اودعك وانت مرتحل

اعيوني بكت دم ٍ جرى مع اسهولها
وانا القيت بالكفين فوقه من الاسى

ولا طاوعت نفسي وصايا عذولها
وتحول اخضاب ٍ في كفوفي كما ترى

وانا درة ٍ مانال منها ختولها
انا لك وفيه بس نفسي يخيفها

كلام الوشاة اللي قريبه انزولها
وعقب مالتقينا صار في ظرف ثانيه

ربيع القلوب الصادقه من محولها
اعاد الزمان النحس ترديد مامضى

افراقن حصل لاشك نفسي خذولها
بثار ٍ لها ممن سعى في فراقنا

وفتاتي يابن سلوم تكفى اخطمولها
انا أظنكم يافزعتي تدركونها

فلاتغفلون بكل دار ابعثولها
ارجال لها تبحث وتفهم حقيقتك

ونجواي عندك يالتميمي قبولها
اعرفك لمن ينخاك تفزع وانا افهمك

نهار الشدايد تعتبر من زحولها
***

وهذا رد ا بن سلوم التميمي على عمير البراق :-
عدتك الرزايا مافجتك بحلولها

وتعداك هم يلحق النفس جولها
الا يارفيق كل ما اهتم ردلي

معانيه جدد ما اندثر من سمولها
يحبك القوافي والمعاني يصوغها

صياغه حكيمٍ عارف كيف اصولها
شكالي ضما نفس ٍ من الحب ما ارتو

تمضى له سنين ومنوته ماينولها
الى صار له صدفه ورود ٍ تكدرت

والارياق ما يروي ضماها بلولها
بلي في محبة من تحثه على الوفا

نهار الوداع وهي تقرب زمولها
فتاة ٍ سلب عقله حلاها وزينها

تهزم الجموع ولا تجمع فلولها
نحيلة خصر فتان مياس عودها

طغت بالجمال وعربوها فحولها
متى ماذكر في النوم ساعة رحيلها

تغنت له الفرقا ودقت طبولها
وهي حالها من جنس حاله وحسرته

بكت من سبب دنيا تفرق شمولها
وبعد ماانتهى همال صافي دموعها

نزف دمها يا اهل الغرام افزعولها
يقولون خضب جاير الدم كفها

كما عامرية قيس لا ترتجولها
انا اخشى فوات عمير من صعب ماقفه

مواقف غرامه يذهب النفس هولها
وشكى كية بين الضماير تمكنت

صطت به ولا قدر الاطبا وصولها
بقت له على طول المدى تبعث الاسى

متى ماذكرها صاب نفسه ذهولها
يابوزبن لو في نجد صارت مصيبتك

فلا اظن شمسك تنرجى عقب افولها
ولكن هوى الغربي ولو طبعه الصلف

قليل الخطر لو صاب حالك نحولها
يابوزبن صدفات الليالي لياصطت

تمادت ولا ساد العذاب محصولها
عليك الرضا والصبر يالطالب الفرج

فلايدرك اثمار المطالب زعولها
ترى عادة الايام تفريق ما اجتمع

حشى ما انت من كثير التجارب جهولها
انا اللي وصلني منك شكوى مصطره

حوت من معانيك الجسام معسولها
معاني سواة الدر واحلى من الشهد

حشى مادخل فيها قليل مهزولها
وانا كان تزهمني فنا ما اترك الطلب

ولو تعترض نفسي مهالك وحولها
ابي منك عنوانه وجنسه وديرته

واسوق الوجيه اللي تسرك حلولها
لعل الوجاهه يافتى الجود تدركه

بتسهيل خلاق البرايا كفولها
وإلى ما حصل بالطيب والصبر والرجا

فنا اعلنت عجز النفس عما يطولها
تزبن شيوخ يوصلونك لغايتك

مواقيفهم كل الملا يشهدولها
هم اللي ليا ضاقت وقاموا تفرجت

ينالون غاياتهم متى ما سعوا لها
فلاكلف الله مسلم فوق طاقته

يابوزبن ربك في كتابه يقولها

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • للتواصل مع ادارة موقع الشعر إضغط هنا.
© 2020 - موقع الشعر