قل آمين

ترجع ل (( جسمي )) بالسلامه قل آمين
والا ترى روحي معك يالمسافر

من رحت .. صار الزين في ناظري شين
واعمري اللي مع هناي امتنافر

أطلقت عقبك من عيوني مساجين
يمشون في دربٍ على الخد حافر

واحترت في أصلي .. أنا شمع .. أو طين؟
العين ذابت .. وابيض الوجه صافر

والضيق يبدا من مدى وحدتي لين
آخر حدود الكون عند الأظافر

يوم انت عندي ؟؟ يغبطونا سلاطين
واليوم شح الحظ .. والحزن وافر

يافرق حالي بيننا أمس .. والحين
مثل اللي يفرق بين مؤمن وكافر

ترجع ل (( جسمي )) بالسلامه قل آمين
وتجيب لي .. روحي .. معك يالمسافر

تمت الاضافة بواسطة:سالم ال فروان