لي صاحب احلام ورديّه
له كل كلي / ولي صيتي

ماشفت انا مترف ٍ زيّه
دلّوع ياناس تربيتي !!

يضحك وانا احكي بجديّه
واحيان يبكي ل تنكيتي

ولا صرت ويّاه رسميّه؟؟
قال انتِ وش جاك صدّيتي

واعَدته..ْولاحضَر ضيّه
ويقول لي: ليه ما جيتي !

كم له يواعدني بجيّه
ولاقد سأل وين هو بيتي

عندي اختبارات يوميّه
ما قاللي كيف سويتي

وإن جبت ميه على ميّه
قال اشكريني على (شيتي) !

ولو شاف شَعره رماديّه
قال السبب يوم حبيتي

لا ؟ .. ويبيني رومنسيّه !!
ولاهو سعودي ولا كويتي

كبَّر مواضيع عاديّه
مفروض تنحل سُكّيتي

ولو عنّه أتأخر شويّه
قال (انتي اللي تخلّيتي..

.. لو تتركين المزاجيّه
صرتي كذا وان تغلّيتي ) !!

وارجع لحبّه بحنيّه
ويرجع لجَمعي وتشتيتي

هو فاهم إنّني جنيّه
ماشاف والله عفاريتي

محناب رجّال وبنيّه
فرعون عاشق نفرتيتي !!

لو قلت فالحب مرثيّه
عوَّد غلاه و شطب بيتي

ليتي معه دامني حيّه
ياليت.. ليته (مثِل) ليتي

مير إني مدري وش النيّه
شكله مخطط على صيتي


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر