الحفلة

لـ عبير بنت أحمد، ، في غير مُحدد

الحفلة - عبير بنت أحمد

اليوم عيدي .. وكل ٍ جاني اْ يهنِّي
قالوا كبرتي .. و انا ابكي كنني طفله

فتَّحت كل الهدايا ( كن بي جنّي !)
كنت احسِب انك فأحَدَها حاضر الحفله

متعشمه فالزمان .. وخاب به ظنّي
قايل لي انك معه يوم اني اوصف له

وادري أنا مانقصني شي... لكنّي
اشوف كلّش لو انّه ناقص .. أصرف له

لوما وجودك بقلبي .. مأنكتب فنِّي
حبي لك .. اكمَل قصيده مالها قفله

وإن شفت فالدرب صاحي .. فإنشده عنِّي
بيقول لك كم متيّم عفت لأوقف له

ودِّي اطفّي معَك شمعي وانا اغنّي
وافاجئك بالقصيده ذي على غفله

وابتل اراضيك .. ثم ّ ازعلّك منِّي
هذا مزاجي .. واخبَرك عاد تعرف له

اليوم ماهوب ( عام ٍ ) يحسَب ف سنّي
وش عيد ميلادي اللي الناس تهتف له ؟

عيدي الحقيقي .. يجي لاجيت تحضنِّي
وفي كل ( لحظه ) تمرّ ؟؟.. اْ نحط له حفله

© 2024 - موقع الشعر