نبض

تمرّد يا نبِض شعري على شيطانك الملعون
تمرّد قبل ِ لا يثري ظلام الحق إجحافي

على تشكيلة ألواني عجزت ألقى حكي به لون
يوضّح لوحة عروقي .. ولا يختل ّ به قافي !

ألا يا جرحي الدامي أنا لك خنجر ٍ مطعون
إذا ما خانني نزفك و صار البلسم الشافي

مدام الطهر له ناس ٍ على بيبانهم مرهون
علام الخبث مايمشي سوى في دربهم حافي؟!!

رحل عنِّي الفضا قصده يدوِّر بينهم عن كون
رجع مع كونهم قصده يزوِّد حمل أكتافي

يناديني سحر همي و لبَّى فرْحيَ المغبون
عجيبه هالزمن دايم يكابد همّ إنصافي !

ركَبْته مركبي ب ابحر على طوفانه المجنون
تمسّكت ْبشراع الحرف لكن ضاع مجدافي

نعم وان كانت حروفي "عبير ٍ" للي ما يدرون
فهي كل الشتات اللي يحاول لمّ أهدافي

نعم وان جفَّت همومي على خفّاقي الممنون
مصير النبض في شِعري يبيِّح سدّه الخافي