بدون أحباب - عبير بنت أحمد

العيد فرحة لقا الأحباب بعد الغياب
وانا حزينه بدون احباب وبْدون عيد

ياعيد ما زدت فيني غير همّ وعذاب
وش زود غيري من الأفراح زاد و يزيد

ألحق سراب ٍ وانا ادري بإني ألحق سراب
وأسكب دموعي وانا ادري بإنها ما تفيد

للهم ألفين باب و للفرَج ( ظل ) باب
ما يمدي آصلْه .. إلا ْوتغرب الشمس أكيد !!

يا شين حسّ العَجَز والعمْر توّه شباب
ويا شين موت الرجا والياس توّه وليد

يشبهني الحزن ..لا..وش جاب حزني لجاب ؟
وان قلت انا والحزِن خِلان ..ويش الجديد ؟

لا صار كل ٍ لأصله ..و الأصِل من تراب
عند الحزن ما فَرَق..أسياد والا عبيد

ومن جرَّب الموت.. قال الموت ما ينتهاب
ومن عزني ؟؟ ليت يدعي لي ب ( موت ٍ ) مديد

ما كان في خاطري أكتب بهمي كتاب
للفم قيد ٍ وللأقلام مليون قيد

مير الشعر جابه الله لي ونيس الغياب
في صبح عيدٍ ..بدون احباب وبْدون عيد

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر