قصة عناي

قالوا علامك ليه ماعمر تفرح
قلت الفرح في دنيتي يا ملا راح

هذا الزمان لحني بالاسى لح
وخلاني افقد من بلاويه الافراح

انا التعيس اللي نعى الحظ واصبح
يشمت على الافراح في وقت الاتراح

واقلبي اللي في ظلوعي تلولح
عجز يشيل الحمل من كثر الاجراح

قصة عناي وحظي اللي مكوشح
ومنين ما عدلت حظ الندم طاح

دلت همومي في ضميري تمرجح
بقفاي وقبالي وممساي وصباح

ساعة فقدت اللي بعينه يذبح
عز الله اني اليوم ماني بمرتاح

ذقت الفراق وشفت انا وجهه اكلح
وياقشر هالدنيا بعد روحت الصاح

حامو علي المبعدين المشفح
وياما على الخلان جاوبت بصياح

اقفو ومعهم معلق القلب لوح
خلوه في ساحات الاتعاس سواح

لحظة توادعنا قلبي تجرح
واصبحت في بحر الهواجيس سباح

روح ولا يدرى على وين روح
يا حسرتي قلبي عليهم به اجراح

ولا واهني الطير بالجو يمرح
ماشرف المرقاب مثلي ولا صاح

يا عين يا اللي دمعك اليوم يمضح
ماعاد ينفع لو جرى الدمع سفاح

لو هو على المقفي يفيد التنوح
إن كان تقضي الناس ليله تنواح

عقب الامل في وصلها شوفها شح
وأنا ما احسب الوقت من قبل شحاح

أم العيون اللي بلحظات تشبح
والوجنه اللي كنها نور الاصباح

ورموش سود في هدبها تلفح
والصدر فيه اللي كما طلع تفاح

زوله بعيني كنه الريم وأملح
غرو كلامه مع لطافته مزاح

ويابو.....الخل عني تنزح
ولا يندرا يا مسندي وين نزاح

خلا الهموم بداخل القلب تسبح
وخلا في وديان الأحزان سواح

الحر مثلك يوم ننخاه يفرح
والا الردي ما ساعة جاب الارباح

ود لعشيري موجز الحال وأشرح
عن حالتي قل يضرب الكف بالراح

من بعدهم بيبان قلبي تفتح
يجي النهار ولا تهنيت بمراح

ماني بالأول من به الحب وضح
الحب تأثيره على كل الأرواح

قبلي شكا عنتر وقيس الملوح
وقبلي شكا محسن على كل ملواح

وأقبل سلامي عد ما السيل جرح
واقبل سلامي عد مابارق لاح

شاعر ولك فطنه وبالشعر تلمح
تفهم معاني الشعر من قبل الإيضاح