عظيم الوصايف - عبدالله العشيشان الشراري

توّ الخفوق اليوم يمسي على خير
من يوم شافك ياعظيم الوصايف

شب الغلا فوق المشاريف ياطير
نار(ن)وقمرا فوق روس النوايف

تعال ياغيم(ن)به احلى تباشير
وخل القمر لعيونك السود شايف

خله يغيب ولايدّور معاذير
وان راح نوره ماعليه الحسايف

تعال نوّر كوني اليوم تنوير
برموشك وخدك وجمر الشفايف

كنك غصون(ن)في ربيعي مزاهير
ترقص اذا هب الهوا للولايف

ربيع عمري انت ورد ونواوير
ونبض الخفوق اللي بهاك الرهايف

غلاك والله فوق وصف وتعابير
بس انت ماتدري وانا حيل خايف

ماتدري انك بالغلا فوق بتصير
في عرش قلبي فوق بالحيل نايف

ثنتين خلن بك عيوني مساهير
بعدك!!وجرح(ن)طاف كل الطوايف

مالي سوى حبك ولالك بعد غير
حبي حبيبي ياعظيم الوصايف

© 2024 - موقع الشعر